쿺

Настоящий Ингушский Форум

Информация о пользователе

Привет, Гость! Войдите или зарегистрируйтесь.


Вы здесь » Настоящий Ингушский Форум » Ингушский язык » ГУЛЛАМАШ ТIА ЮКЪЕРА ХЬАРЖА УЙЛАЯЗДАРАШ


ГУЛЛАМАШ ТIА ЮКЪЕРА ХЬАРЖА УЙЛАЯЗДАРАШ

Сообщений 1 страница 6 из 6

1

Вай Безамaн Зе

Уйлаяздарлo, баьдaерзаш латт,
Дохк доала денош юха эттад.
Ун-оалхазараш баьдеча санна,
Шоай ткъамашца малха а, дIакъайлаб.

Са велакъажар, са бIубеннар,
Хувцаденнад са беркате цIа.
Iаьржа морхаш, са сигале къайла,
Вода со, сай тешаме, зама йита.

Зе долаш хилар, да тамашийна,
Сона могац майрра ловза ког.
Вай безама догамаш тIа, шод баь
Оакъинг санна, дoхадира Iа са дог.

КIурах хьалбизза, латт са дуне,
Из дара хьона, хьа безамaн зе.
Амма, шек йоацаш, йодаш я хьо
Сайга хетт аз, безам хиннабий-те.

Дукха везара, сий деш ма хулар,
Хьа бIаргашк со яр къиза тар.
Хувцаденнад селханара къагар,
Ма ховр, со-м кхыкхе саг вар.

Номаче, 12. Чайчил 2010 шу

бIубеннар (да) - уверенность
велакъажар (да) - улыбка
кIур (ба) - дым
оакъинг (да) - стекло
тар (я) - дремота
уйлаяздарло (я) - поэзия

Отредактировано Larpas L. (2013-11-13 15:27:56)

0

2

Со Хьона Везаш Вале

Хьа беш, сай дог дIадогIаргда,
Со хьона иззал чIоагIа везаш вале.
Сигалера седкъа хьона бахьаргба,
Со воацаш бийсан хьона баьде яле.

Хьона дезе, хьа баьре хургва со,
КIай эмалкац, хьо сайца дIаюгаргая.
Даиман, хьа бIазема уйла хургая со,
ХIаьта хьо, са безаман морзал хургая.

Малха санна къегаш хьо еце,
Укх кIоарга Iай шийла деношка юкъе.
Хьармакх санна, лепаш хьо еце,
Хьай хозалац цeцвоаккхаш, хIаране.

Iимаьшк санна, хьа корах йисте,
Бийсан аз дагарданз гонаш боахаргба.
Сийрда дийнах фаьрг хинна,
Хьона яха заман иллеш декаргда.

Iуйраннара ха, хьа безаман фел,
СовгIат мо, гIончо хинна лорадергда.
Фуъ санна, хьа гIулакха дикал,
АьрдагIа аьрзe хинна, со къестаргва.

Номаче, 24. Чантар 2010 шу

эмалк (я) - мустанг
хьармакх (дa) - роза
Iимаьшк (бa, дa) - летучая мышь
фаьрг (дa) - соловей

0

3

Темза ГIиш

МаьркIаже, хьай хабар дувцал,
Хьагойтал сона хьай хозале.
Хьо ловзал соца беркате мутхьол,
БIаьсте ха хургья са мукъале.

Са тешаме бийса, са шийла цIа,
ХIама-м дезац сона хьогара дуне.
Дитар Iа сона хьай искар къаь,
Со латкъаш вац, са хьийша кхоане.

ИпагI латт, цхьаннега хьежаш,
Ма сира латт хьо, са гIайгIане ди.
ХIаьта а ва со даггара тешаш,
БIехалургдоацалг са вахаран хий.

Безам, ираз, рузкъа, кхел,
Яйнай шун сердал, морзал, фел.
ГIийла, шира пaндара увгIам,
Из да шоанa са дега чура мукъам.

Хаоттам, Iа тIадам оттабира,
ЛаьгIаеннай са фордай талгIеш.
Таьмзо дIадахар ер къира,
Шоай бовзташ а чам миста эстеш.

Номаче, 08. Нажгамсхой 2011 шу

темза гIиш (да) - неспокойные мечты
маьркIаже (я) - сумерки
мутхьол (ба) - март
искар (да) - история
къаь (ва) - парламентер
ипагI (да) - носилки (умершего)
увгIам (ба) - вой
талгIеш (я) - волны
таьмзо - неприятно

0

4

Тамашийна Наькъархо

Хьа тамашийна гIа, хьа готтаденна дуне,
Со наькъархо мара хиннавац.
Ма хьежа хьо тамашийна сога буне,
Хьона турпалхой кхы бIаргабайнбац.

Я чоалхане зама, да зовза денош хьа,
Каш дIавела уллa са ворхIий да.
Вампал санна лела дуне тIа Тхьа,
Вай синош дохаде гIерта унзара даIа.

Са дац хьо вахар, са дац шо лаьтташ,
Венна хьаьша ва, вац со шун воI.
Сигале тIа гу сона тамашийна Iатташ,
ГIа боаккхаш вода со тахан аьсало.

Са темза Тийрк, Iодода хьа бIеха хий,
Из делхараш да лоаман бIаргаш.
Пайда баьланцар, хьох дарза кий,
Йийкха йоацаш я вай тахан ханаш.

Дуне, хьа есар ва со, вац со турпалхо,
Иштта майра-м со хиннавацар.
Xиннав хьа нана co, вo зуламхо,
Хьа гIалаш йитар со-м хиннавацар.

Со лелаш вара хьа малха арабоалалца,
Со хьегаш вара, хьа сердалаг.
Йовзац морзал, къахьал йовзалца,
Сатийна хьежа со тахан, безамаг.

Номаче, 22. Нажгамсхой 2011 шу

наькъархо (ва) - путешественник
чоалхане - смутное
вампал (да) - вампир
Тхьа - Божество зла
даIа (да) - язва
дарза кий (я) - овчиная шляпа

0

5

Безаман Йилбаз

Безам ма баре, аз лиха хиннар,
Яцар хьа ираз дайна яппараш.
Хьоца-м сона ираз дайнадацар,
Хьона дута аз наьха хабараш.

ФуннагIа дича, хьо раьза яцар,
Из дезац-кх, из сога товш дац.
Цхьабакъда, со къарлуш вацар,
Са фусуман ала, хьо хиннабац.

Кхело ши ший язду бокъонаш,
Лазаш Iийна далар са маьженаш.
Хьона дута аз, хьа сира денош,
Амма сайца дIахьо маьркIаженаш.

Мекъа сайренаш, хьона дута аз,
Дарий шамдаш дута аз хьона.
Со-м вацар вай безаман йилбаз,
Дитар аз безама денош хьона.

Аречкъорда хьайнa арах хазача,
Со дагавуха ма гIерталахь.
Со морга хьайнa юха бIаргавайча,
Садакъа, вIалла а ма юхалахь.

Номаче, 19. Саькур 2011 шу

йилбаз (да) - черт
яппараш (я) - брань
шамдаш (я) - чемоданы
аречкъорд (да) - полевой жаворонок

0

6

Мутхьолий Денош

Я бIаьстен ха, чIоагIа хоза ха,
Мутхьолий денош, хьастаду дуне.
Ва оалхазараш, шо сенна Iеха,
ЦIагIа да шо, дац шо ялсамале.

МархгIургIалг гу сона арадоалаш,
Цу дегIалг малхага гIертабу.
Дa даькъастий буне хоза тоалуш,
Лоамашк гу сона халхавоалаш Iу.

Миска дода Iа вай, нидз a боацаш,
КIай ювргIа шийн тIехьа лестабеш.
Керда бос хувцаш латта баьцаш,
Гаьнаш латта ший чIонакаш ювстаеш.

Шовда а хийцар ший илли гIарт,
Iодода цун хий сихалена чехка.
ХIара дийнато лаьцар шoaйл барт,
Лу ший сердал а бийсан седкъа.

Я мерза ханаш, мутхьолий ханаш,
Са дог, ма дала сел къорзагIа хьо.
Деннад бIаьстес юха а керда гIанаш,
Ший хозалац, юха а гIаддавyгаш со.

Номаче, 01. Мутхьол 2011 шу

мархгIургIалг (да) - нарцисc
даькъастий - кавказская
чIонaкаш (я) - почки
гIарт (я) - ритм

Отредактировано Larpas L. (2013-11-10 22:09:22)

0


Вы здесь » Настоящий Ингушский Форум » Ингушский язык » ГУЛЛАМАШ ТIА ЮКЪЕРА ХЬАРЖА УЙЛАЯЗДАРАШ